Dowladda Soomaaliya ayaa shaacisay inuu dhawaan furmi doono wada-hadallo ay la galayaan Puntland,si loo xaliyo khilaafadka labada dhinaca.

Madaxweynaha Soomaaliya Xasan Sheekh Maxamuud oo arrintan ka hadlay waxaa uu si cad u sheegay maamulka Puntland inuu yahay maamul jira, isla markaana ay dowladdu qaddarinayso go’aanka iyo rabitaanka dadka ku nool deegaannada maamulkaas, kaddib markii uu muran ka dhashay maamul ay dowladda Soomaaliya ku lug leedahay oo loo sameynayo gobollada Mudug iyo Galgaduud.

“Dhawaan ayay dowladda federaalka wadahadallo la furi doontaa Puntland, waxaana xal ka gaari doonnaa murankii dhawaan soo dhexgalay maamulka Puntland iyo dowladda dhexe,” ayuu yiri madaxweyne Xasan Sheekh.

Xasan Sheekh waxaa uu ku ammaanay Puntland horumarka ay gaartay,isagoona si gaar ah u tilmaamay doorashadii madaxweyne ee bilowgii sannadkan ka dhacday Garoowe,balse waxaa uu tilmaamay madaxda Puntland inay ay ka caroodeen maamul u sameynta gobollada dhexe, taasna ay tahay mid ay xaq u leedahay dowladda dhexe ee Soomaaliya.

Madaxweynaha ayaa sheegay in maamul u samaynta gobollada Mudug iyo Galgaduud ay dowladdu waafajinayso nidaamka federaalka ah iyo dastuurka u yaalla dalka, iyadoo dib-u-eegis ay samaysay dowladda uu ka soo baxay in la sameeyo maamul KMG ah ah.

Xasan Sheekh Maxamuud ayaa tilmaamay in ujeeddada loo samaynayo maamul mideeya gobbollada Mudug iyo Galgaduud aanu ahayn in la carqaladeeyo ama la kala qeybiyo Puntland, balse ay dowladdu doonayso in dalka ay ka dhaqan geliso dastuurka, oo nidaamka federaalka ah la gaarsiiyo gobollada oo dhan.

Wuxuu sheegay in dhowaan wafdi ballaaran oo ay hoggaaminayaan qaar ka tirsan madaxda dalka ay dowladda u diri doonto Puntland, kuwaas oo kala xaajoon doono arrintaas.

Hadalka madaxweynaha Soomaaliya ka soo baxay waxaa uu ku soo aadaya xilli dhawaan afhayeenka Puntland uu sheegay muddo soddon cisho ah inay u qabteen wada-hadalka dowladda Soomaaliya ay la galayaan.