May 4, 2012 | Posted by admin

DUHUR-Tiro madaafiic ah ayaa habeenimadii xalay laga maqlay aga gaarka Madaxtooyada Soomaaliya ee magaalada Muqdisho.

Madaafiicda oo socotay qaddar kooban ayaa waxay ku dhaceen aga gaarka Madaxtooyada Villa Soomaaliya ilaa hadda lama soo sheegin wax khasaare ah oo ka dhashay.

Wararka qaar ayaa sheegaaya in qaar kamid ah madaafiicda ay ku dhaceen gudaha Madaxtooyada, hase yeeshee maaha kuwa si rasmi ah loo xaqiijiyey.

Lama oga cidda soo tuurtay madaafiicda xalay lagu garaacay Madaxtooyada Villa Soomaaliya iyo meesha laga soo tuuray.

Dhanka kale dilal kala duwan ayaa habeenimadii xalay ka dhacay qaybo kamid ah magaalada Muqdisho.

Ilaa afar ruux aya habeenimadii xalay lagu dilay gudaha magaalada Muqdisho.

Iska hor imaad kooban ayaa habeenimadii xalay xaafadda Xamar Jadiid ee degmada Wardhiigley ku dhexmaray rag katirsan Al shabaab iyo Ciidamo Dawladda katirsan halkaasi waxaa ku geeriyooday hal nin katirsan shabaabka.

Sidoo kale kooxo hubaysan ayaa habeenimadii xalay degmada Kaaraan ku dilay labo qof oo mid kamid ah la sheegay in uu ahaa sarkaal katirsan Dawladda KMG ah, waxaana lagu magcaabi jiray Cali Yare Maxamed.

Ciidamada Dawladda ayaa saaka hawlgallo ballaaran ka sameeyey xaafadahii ay shalay ka dhaceen dilalka, waxaana jira dad ay falalkaasi usoo qab qabteen.

Qaybo kamid ah magaalada Muqdisho ayaa xilliyada habeenki ah waxaa ka dhaca falal amni darro oo dilal qorshaysan u badan.

COMMENTS