Maansada Dardaaran

Maansadan Dardaaran waa Maanso waano iyo waayosheeg ah, waa maanso farriin ah oo la hadlaysa guud ahaan dadka Soomaaliyeed oo dhan, Madax iyo shacab, Mudane iyo Marwo, Waa maanso aan is idhi waxay waxtar iyo talo u noqon doontaa dhallinyarada, waxay xusuus iyo caqlicelin u noqondoontaa waayeelka, waxay tusaale iyo tusmo u noqon doontaa  dadka qaybahooda kala duwan. Haddaba  anigoo hordhaca Maansada kugu daalin waa  tane Boggasho wacan

Dardaaran

Dambarsame hooray

Cirkoo da’ay maalmo

Nin dayr cad u joogo

U daaqana Geelu

Dambarka iyo Dhaayda

Maggow dihinkeeda

Lis iyo dararteeda

Dirkeed nin yaqaanna

Doobbuu ku lisaaye.

Suugaan dirirkeeda

Dawiyo nabad doora

Duciyo sama doona

Dardaaran adduunyo

Dantaada haddeera

Daartaada dambeeto

Digniin ku faraysa.

Haddaan dulucdeyda

U soo dego haatan

Dadbaa jira heedheh

Ku duufin habaabin

Ku doorin adoo dhan

Ku duugi hadhkiiye

Midbaa ku dilaaya

Dantiisana mooda

Midbaa ku duraaya

Dood fiican u haysta

Ka dayr dhegahaaga

Daymoona hortaada

Gadaal ha ku daalin.

Daryeel danahaaga

U duubo naftaada

Danee noloshaada

Xumaanna ka daahir

Difaacna wanaagga

Dalee socodkaaga

La duulna filkaaga

Ku dooro dadkaaga

Dareenka aqoonta

Damiirka wanaagsan

Dabeecadda fiican

Wixii danni keena

Naftaada damqaaya

Ka dool waligaaba.

Dan waa dabar heedheh

Ha diidin nasiibka

Ha doorin hankaaga

Haa doojin dabaylo

Hawiyo damac beena .

Haddaad dacwad faafin

Diin aad dad barayso

Daliil cad u keenso

Qofkii kugu diida

Dudmada ka ilaali

Danseeg ha ku sheegin

Dambiile dullaysan

Docdaad ka filaysay

Hadduu ka didaayo

Doc kale kaga kaalay.

Deegaanka agtaada
Derisyo Ehelkaaga

Darxumo ha ku eegin

Daab weyn ha u qaadan

Dagaal ka ilaali

Ha dilin gacalkaaga.

Diif iyo dibindaabyo

Agoonta dalkaaga

Dugsi cilmi haysan

Dawiyo Dhakhtar haysan

Dudiyo aqal haysan

Dayaca u dhammaatay

Wuxuun ugu deeqa.

Haweenka daneeya

U dooda xaqooda

Ka dayra dhibaato

Diciifna ha moodin

Door weeye habboone

Dirkeena dad oo dhan

Dunjiga Ilma Aadan

Dunida cammiraaya

Kuwii dihday weeye

Dushoodana saaray

Digtoor wax is mooda

Halyeeyga la doorto

Geesiga diriraaya

Deeqsiga lagu faano

Ugaaska la duubo

Wadaad digriyaaya

Hooyaa dad ka yeeshay

Tafteeda ku duubtay

Ducana ugu laabtay

Marwaa ka danbaysa

Daboosha xuntiisa
Daryeesha dhibkiisa
Daaraysa Ifkiisa

War hooy dumarkeena

Diihaal ka ilaalsha

Ayaan la dagaalin.

Dalkiyo dhinaciisa

Haddaad mar ka duushay

Deegaan kale joogto

Haddaad ku danbayso

Dal waa ku dadkiise

Dowlaa wax taraysa

Dadkuna ka sugtaaye

Haddii dahnigaagu

Dubaaqu ku siiyey

Dambaad ku jirtaaye

La duubo dadkaaga

Ku deeq cilmigaaga

Ku deeq hantidaada

Ku deeq caqligaaga

Ku deeq kartidaada

Ku deeq fahankaaga

Ku deeq cududdaada.

Dadoow caqli maaha

Dowlaa wax dhisaysa

Ku daawo dhankaaga

Haddaadan dantaada

Intaad yar daboosho

Tan guud ku daraynin

Dhulkeenna dakaamay

Dushiisa xalaynin

Dorraato ka dhawrin

Waxaan la dayoownay

Duul meel kale jooga

Wallee dayaceena

Ma doorin karaane

Dadoow is xasuusta

Dalkiina daryeela.

Dadyahow hadafkiina

Dir sooca ka saara

Waxaad dura eedday

Duumaale ku xaaqay

Dubbihii dumintaada

Dadkaaga dhammeeyey

Dalkaaga ka reebay

Dadyoowga adduunka

Dirkii hebel weeye

Anaa ina duur ah

Dir Aarka Libaaxa

Intaad iska dayside

Daliilka Kitaabka

Culuumtiyo Diinta

Intii Daayim sheegay

U daaya qabiilka

Waxaad ku darteena

Dadoow iska daaya.

Danaystaha diida

Daneeyaha doona

Dulmiilaha doorsha

Kan daacada doorta

Danguud u adeega

Dareen ubadkaaga

Damaaci xumaale

Inuu dab u dhiibo

Ayuu dan bidaaye

Ninkii dersi maalin

Dadkeena barayaa

La duubta dhankiisa

Ninkii dahabkeena

Macaadinta duugan

Dad kale ka gadaaya

Ninkii degelkeena

Dantiisa ka doorta

Digtooni ka yeesha

Dadoow warxumaale

Ma doorshe la doorshay

Dambuun daldalaaya

Dadkiisa xumeeya

Dambaabidhe keena

Belaaya daneeye

Dirkiisa ha eegin

Durriyad ma wadaagno

Ninkii na dilaaya

Danaystiyo tuugga

Dadkuu xige maanta

Naftaada dilayaa

Dalkaaga gubaaya

Durbaan ha u qaadin

Dartii ha u doodin

Ceebtiisa  ha duugin

Ha dedin xumihiisa

Dardaaran xaq weeye

Dadoow iyo waano

Naftiina la doono.

Bal daawo dalkaaga

Waxaa bad ku dayrin

Webiyo durduraaya

Bal daawo dalkaaga

Waxaa deleg buuxa

Ee Daa’in ku beeray

Bal daawo dalkaaga

Waxaa dhir dalaysan

Dushiisa ka taagan

Bal daawo dalkaaga

Mawaashiga duunyo

Lo’deena dawaysan

Adhiga dacal buuxa

Waxaa dayrcad jooga

Doobiga lagu maalo

Dar aan qalanayno

Bal daawo dalkeena

Duurjoogta Ugaadha

Wax Cawl iyo Deero

Dameer Farow buuxa

Biciid dananaaya

Bal daawo dalkeena

Qaboow ku dilaaya

Kulayl ku damqaaya

Diraac iyo Deyrta

Duggaa arki maysid

Bal daawo dalkeena

Waxaa nimco daadsan

Galleydiyo Diirta
Sarreenka dalkeena
Intaan iska diiddo

Intaad Dubeey aadi

Dalkaaga ku beero

Intaad dibad raadin

Ku daarinna Buufis
Ku daah degelkaaga

Intaad wax dilayso

Dullaab ka ahaada

Intaad duminayso

Dhiskiisa u duubo

Dedaalka nafteena

Dalkeena dhisaaye

Duqayda haddeeriyo

Dhallinta daba joogta

Da’ yarta dhalanaysa

Dhegtii u daloosha

Dardaaran galaaye

Dantiinna ogaada

Dalkiina ogaada

Dadkiina ogaada.

Cabdiraxiin Hilowle Galayr

Galayr1977@hotmail.com